Las novas cifras da l’Uffizi federal per la sanadad publica mussan ch'ils cas da FSME, ina sort inflammaziun dal tscharvè che po chaschunar grevas cumplicaziuns, han prendì tiers fitg questa stad. Quella malsogna vegn transmessa da raischens.
Las cifras da quest onn fetschian schon in pau quitads ad el, di Patrick Mathys che lavura tar l'Uffizi federal per la sanadad publica ed è spezialisà sin las malsognas transmissiblas. Enfin la fin da settember hajan els nudà 326 infecziuns cun il virus da FSME. Circa in terz dapli che l'entir onn passà e la pli auta cifra dapi che las infecziuns vegnan registradas.
Raschuns per augment betg enconuschentas
Pertge ch'il dumber è creschì uschè fitg na sappian els betg dir cun segirtad. Forsa saja la stad fitg chauda e sitga ina raschun. «I pudess esser che la populaziun dals raischens è creschida, pussaivel è dentant era che la glieud è stada pli savens en il liber ed è perquai vegnida piztgada pli savens. I pudess dentant era esser che las piztgadas han prendì tiers pervia da la temperatura. Nus na savain betg, quai èn mo speculaziuns. Quai che nus vesain fitg cler è l’augment dals cas.»
Cler saja per l'expert Mathys ch'igl è oz pli privlus da spassegiar sper las sendas da viandar e tras il chagliom. La populaziun sappia quai atgnamain era, è Mathys persvas. Questa stad saja il tema dals raischens stà pliras giadas prominent en las medias. I saja però anc adina uschia che las piztgadas dals raischens vegnan anc adina bagatellisadas e ch’ins na fa betg il connex ch’ina piztgada dad in raischen po chaschunar ina malsogna greva.
Regiuns da privel creschan
Infurmaziun saja perquai vinavant necessaria. Per exempel davart las regiuns nua ch'il privel da vegnir infectà cun il virus da FSME è grond. Quellas regiuns da privel creschian. «Nus observain quai e vegnin era ad adattar nossas recumandaziuns. Igl è per exempel pussaivel che nus schlargiain nossa recumandaziun per la vaccinaziun cunter FSME e che ulteriuras regiuns vegnan vitiers.»
Mesiras concretas vegni l’Uffizi federal per la sanadad publica a decider pir suenter november. Per uffants che vivian en ina regiun da privel e che termaglian savens en il liber na saja il cussegl als geniturs da laschar far la vaccinaziun segir betg fauss, concluda Mathys.
RR actualitad 12:00
