L'affera da cugliunarias da subvenziuns da l'Auto da Posta n'è anc betg lavurada si giuridicamain. Uss datti ina decisiun penala da l'Uffizi federal da Polizia Fedpol. Cunter anteriuras persunas da cader d'Auto da Posta datti multas tranter 56'000 e 420'000 francs.
La decisiun n'è dentant anc betg legalmain valaivla. Las persunas inculpadas pon anc adina pretender ina examinaziun giuridica dal cas. Sco il Fedpol annunzia vinavant, èn las premissas per chastis da detenziun betg dadas.
L'affera ha cumenzà l'atun 2017. L'Uffizi federal da traffic ha constatà tar ina revisiun che Auto da Posta ha zuppentà gudogns dapi il 2007 gudogns per survegnir dapli subvenziuns. Il december 2018 ed il schaner 2019 ha la Posta pajà enavos 205,3 milliuns francs a la Confederaziun, als chantuns ed a las vischnancas.