Siglir tar il cuntegn
Inhalt

Svizra AutoDaPosta ha cugliunà era a l’ester

L'AutoDaPosta ha er cugliunà tar sias societads en Frantscha ed il Principadi dal Lichtenstein. La rentabilitad da l'engaschament a l'exteriur na saja betg vegnida preschentada cumplettamain, conceda la Posta.

Ina fila dad autos da posta, in sper l’auter.
Legenda: Era a l’ester n’èn ils quints da l’AutoDaPosta betg en urden. Keystone

Examinaziuns da la Posta hajan confermà che l'AutodaPosta haja pajà ora en il zuppà gudogns da radund 67 milliuns francs a la sedia principala, e quai dal 2007 fin il 2012. Cun questa pratica sajan ils gudogns da l'interpresa vegnids tegnids bass. Quai na saja betg acceptabel, hai num.

Las infurmaziuns na bastan betg

La cumissiun da gestiun dal Cussegl dals chantuns pretenda dapli infurmaziuns davart il scandal da AutodaPosta. La sutcumissiun haja decis da trametter ina retscha da dumondas al cussegl d'administraziun ed a la ministra da posta, ha communitgà la cumissiun da gestiun CdG. L’avust vul la cumissiun puspè tractar questa fatschenta.

Audiziun dals pli impurtants acturs

Suenter ch'il rapport d'inquisiziun davart l'AutodaPosta era vegnì publitgà, aveva la cumissiun tadlà las decleraziuns dals pli impurtants acturs, tranter auter, da la ministra da la Posta, Doris Leuthard, e dal president dal cussegl d'administraziun, Urs Schwaller. La Posta ha onns a la lunga zuppentà gudogns ed uschia incassà subvenziuns memia autas da la Confederaziun e dals chantuns.

RR novitads 17:00