Siglir tar il cuntegn

Svizra AutoDaPosta vinavant sut la marella

Co l'AutoDaPosta ha traffitgà avant il 2007 cun subvenziuns publicas fatschenta uss La Posta. L'Uffizi federal da traffic pretenda ussa ulteriurs documents.

Auto da posta en l'Engiadina.
Legenda: Ulteriur pass en il scandal da l'AutoDaPosta. Keystone

Ils documents correspundents ha l'Uffizi federal da traffic empustà tar La Posta, sco la pledadra da l'uffizi, Olivia Ebinger, ha ditg envers radio SRF. Els hajan divers indizis ch'i valia la paina da sa fatschentar cun la pratica da l'AutoDaPosta SA avant il 2007.

Cugliunarias forsa gia dapi la fin dals onns 1990

Concret ha il president da La Posta Urs Schwaller declerà mez zercladur, che las cugliunarias tar l'AutoDaPosta hajan probablamain gia cumenzà la fin dals onns 1990. Ed era en il rapport d'inquisiziun, che La Posta ha laschà far, vegn menziunà ch'igl è pussaivel, ch'i sajan vegnids fatg gia davent da l'onn 1998 trics da contabilitad.

La Posta conferma d'avair obtegnì la brev da l'uffizi federal e metta en vista transparenza totala.

Nagin rembursament

L'Uffizi federal da traffic lascha dentant avert, sch'el vul pli tard pretender enavos daners per il temp avant il 2007. Giuridicamain fiss quai strusch pussaivel, perquai ch'ils delicts scadan suenter 10 onns. La Confederaziun pudess pia betg pli pretender in rembursament, pussaivel fiss be in pajament voluntari da La Posta.

RR novitads 07:00