Siglir tar il cuntegn
Inhalt

Svizra AutoDaPosta vul stritgar fin 60 plazzas

Sco consequenza da l'affera davart las cudischaziuns illegalas vul l'interpresa s'orientar da nov ed ha annunzià restructuraziuns. 40 fin 60 plazzas pudessan vegnir stritgadas. L'interpresa ha instradà il glindesdi la procedura da consultaziun.

Autos da posta.
Legenda: Sco consequenza da l'affera AutoDaPosta ha l'interpresa annunzià restructuraziuns. Keystone

AutoDaPosta veglia sa concentrar strategicamain puspè dapli sin la fatschenta centrala. Il focus duaja vegnir mess sin il servetsch public e la preschientscha en la regiuns vegnia rinforzada. Quai ha l'interpresa communitgà il glindesdi.

Per ina part dal persunal vegnia la restructuraziun ad avair consequenzas. Per ina part dal persunal mida sulet il patrun giuridic. La raschun è che la structura da holding vegn schliada e las tschintg organisaziuns dad AutoDaPosta vegnan messas sut in tetg – AutoDaPosta SA.

Naginas midadas per manischunzs e controlladers

Pervi da la reorganisaziun e pli gronda preschientscha en las regiuns pudessi tar il persunal administrativ dar midadas da cumpetenzas e da cundiziuns da lavur. Betg a sa midar vegnian però las cundiziuns da lavur per ils manischunzs ed il persunal da controlla. Quai èn dus terzs dal persunal.

Cun la restructuraziun pudessan vegnir nizzegiadas sinergias. Quai pudess avair la consequenza che 40 fin 60 collavuraturs perdessan la plazza. En general veglia AutoDaPosta dentant reducir las plazzas da lavur cun la fluctuaziun natirala e cun pensiunaments.

RR novitads 12:00