En l'avegnir duain automobilistas ed automobilists pir a partir da 75 onns stuair ir regularmain tar ina controlla medicinala e betg gia cun 70 onns sco fin qua. Quai ha decis il Cussegl naziunal cun 97:82 vuschs. Uschia ha el dà suatientscha ad ina iniziativa parlamentara da Maximilian Reimann da la PPS Argovia.
Per l'iniziant Reimann munta la regla actuala ina discriminaziun per las persunas attempadas en Svizra. En ils pajais vischins na stoppian automobilistas ed automobilists sur 70 onns betg far sumegliantas controllas medicinalas, argumentescha Reimann. Er la statistica na mussia betg dapli accidents da persunas sur 70 onns cumpareglià cun autras gruppas da vegliadetgna.
Avant ch'in sboz da lescha po vegnir elavurà, sto er il Cussegl dals chantuns approvar l'iniziativa.
RR novitads 06:00