Siglir tar il cuntegn
Inhalt

Svizra Autostradas svizras en bun stadi

La rait d’autostradas en Svizra n’ha betg donns relevants. Quai valia per tunnels, punts e mirs da segirtad. Ils custs da mantegniment creschian dentant. A questa conclusiun vegn l'Uffizi federal per vias Astra en in rapport.

Autostrada cun traffic.
Legenda: Autostradas svizras èn segiras. Keystone

Er sche las vias naziunalas en Svizra èn en in bun stadi, s'augmentan ils custs da mantegniment. L'onn passà han quels muntà a 780 milliuns francs. Fin il 2030 stima l'Astra ch'ils custs da mantegniment vegnan a crescher sin 1,11 milliardas francs. Er l'extensiun e la gestiun da las vias vegnia pli chara.

Raschuns per quai èn la vegliadetgna da las vias e l'augment dal traffic. Ultra da quai surpiglia la Confederaziun il 2020 stgars 400 km vias dals chantuns. Il basegn da finanzas creschent po vegnir cuvert grazia al nov fond per las vias naziunalas ed il traffic d'aglomeraziun. Cun quel stattan a disposiziun mintg'onn trais milliardas francs.

Vias èn segiras

Tenor il rapport na datti actualmain nagins donns vi da las vias ch'han in'influenza sin la segirtad. Bunamain 95% dals vials èn vegnids valitads sco buns ubain en la media, 4% sco suffizient e mo 1% sco critic. Critic vul dir, ch'i dat bain gronds donns, quels n'han però nagin effect sin la segirtad dal traffic.

89% da las construcziuns d'art sco tunnels, punts, mirs da sustegn e sutpassadis èn en in bun stadi ubain en in stadi acceptabel. 10% valan sco donnegiads ed 1% sco schlet. L'ultim vul dir, che gronds donns chaschunan a media vista investiziuns. La segirtad n'è però betg periclitada.

Tar ils tunnels ed ils fundaments èn 80% en in stadi bun u acceptabel. 16% èn donnegiads e 4% èn vegnids valitads sco schlets. Er qua na datti però nagins problems cun la segirtad. Tar ils cundrizs da segirezza e da gestiun èn 80% vegnids valitads sco buns e 20% sco acceptabels.

En tut èn actualmain 1'855 km vias naziunalas en funcziun. 1'742 km da quellas èn autostradas. La lunghezza planisada munta a 1'893 km. La rait da las vias naziunalas cumpiglia 459 tunnels e 4'559 punts d'autostrada.

RR novitads 16:00