Siglir tar il cuntegn

Header

Skis sin ina sutgera.
Legenda: Entras il prender a fit ils skis pon las fatschentas en ils lieus da sport far dapli fatschenta. Keystone
cuntegn

Svizra Avant 30 onns rievan ins anc sur da prender a fit skis

L'industria che producescha skis vuleva pli gugent vender directamain a la glieud che da vender ad ina fatschenta sport per laschar a tschains. E las fatschentas da sport avevan l'impressiun, ch'il Svizzer e la Svizra veglian pli gugent posseder ed avair lur agens skis en tschaler. Oz è quai auter.

Ils onns 80 n'eran dentant betg favuraivels per las fatschentas da sport en las destinaziuns turisticas. Il motiv: ils skis vegnivan vendids per pretschs fitg bunmartgads gia il settember e l'october en las citads, avant che la stagiun aveva cumenzà en las destinaziuns turisticas. Uschia restava be pli ina pitschna part per las fatschentas en ils lieus da sport.

«Swissrent» - in'idea cun success

Per sustegnair las fatschentas da sport en las destinaziuns d'enviern, professiunalisar la fatschenta da dar a fit urden da skis e porscher a la clientella ina alternativa pli favuraivla tar il cumprar, ha ils dus piuniers Köbi Durisch e Jürg Pesko fundà la Rentaski AG cun la marca Swissrent.

En furma da collavuraziun porscha la Rentaski AG a las fatschentas il material per dar a fit e surpiglia tut la lavur da marketing inclusiv la plattafurma per prender a fit skis en l'internet. Uschia pon la fatschentas localas sa concentrar sin la cussegliaziun dals clients.

Quella idea ha gì tant success che er autras fatschentas sco Intersport han copià il model. Perquai ha la Rentaski AG n'er betg il monopol en Svizra. L'onn d'entschatta, 1987, collavuravan 30 fatschentas cun la Rentaski AG, oz passa 50. Tenor Boris Bossi, il CEO actual da la Rentaski AG, sajan ils lieus da fatschenta pli u main repartids en Svizra. El na vesa pia betg potenzial tar dapli fatschentas mabain plitost tar dapli clientiella. Actualmain prendian radund 45% dals Svizzers a fit l'urden da skis. I saja dentant realistic da cuntanscher 65%.

Artitgels legids il pli savens

Scrollar a sanestra Scrollar a dretga