La midada da structura en l’industria n’ha betg chaschunà dapli dischoccupaziun en Svizra. Quai mussa in’analisa dal laboratori d’ideas liberal «Avenir Suisse». A l’industria saja reussì d’offrir dapli servetschs en il sectur da la digitalisaziun, enstagl da simplamain accelerar la producziun. Da differenziar tranter il sectur secundar e terziar daventia adina damain impurtant, constatescha «Avenir Suisse».
Il laboratori recumonda dad er desister en l'avegnir dad intervenziuns statalas en la politica d'industria. Impurtantas sajan percunter bunas cundiziuns generalas e stabilas relaziuns commerzialas cun l'UE.