Atgnamain ha la societad aviatica svizra Swiss vulì realisar fin il december puspè mintga segund sgol. Ma quai n'è betg realistic. Il mument quinta la Swiss ch'ella po fin lura sgular 30 fin 40% dals sgols, ha ditg il schef dala rait Michael Trestl ad in discurs da medias. Pervi da las numerusas restricziuns da viadi pervi da la pandemia restia l'urari da l'enviern (november fin mars) probabel marcantamain sut las spetgas.
La societad mamma da la Swiss, la Lufthansa, hà entant dà enconuschent ulteriurs plans da redimensiunar la fatschenta. Almain 150 sgols restian durabel per terra, hai num.
Ferma dumonda da vitgira
Almain profitescha la Swiss dal traffic da vitgira. Quel n'è normalmain betg uschè en il focus. Uss vegnan però aviuns da passagiers emplenids cun rauba. Fin la fin d'avust ha la Swiss fatg radund 800 sgols spirontamain da vitgira e transportà 27'000 tonnas material. Uschia po la societad aviatica almain porscher sgols a distanza lunga che na fissan uschigliò betg pussibels.
Perdita d'in milliun a di
Vinavant perda la Swiss mintga di radund in milliun francs a di, quai di Oliver Buchhofer, il manader dal manaschi da sgol. Durant l'emprima unda da corona, l'avrigl ed il matg eran quai schizunt trais milliuns a di. Il mument dovra la Swiss agid federal. En total ha la Confederaziun decidì garanzias da 1,275 milliardas francs per la Swiss e sia sora Edelweiss.