Siglir tar il cuntegn

Header

cuntegn

Aviatica militara Ulteriurs scharniers cun stgarps tar ils F/A 18

Vid ils aviuns da cumbat F/A 18 da l'armada svizra vegnan il mument controllads ils scharniers da las alettas d'atterrar. Entant han ins controllà 11 dals jets. 15 scharniers han gì stgarps.

Raschun per l'examinaziun dals aviuns è stada ch'ins ha chattà ils 9 d'october tar ina controlla stgarps en ils scharniers vid in'aletta d'atterrar. Sco mesira immediata ha il cumandant da l'aviatica militara ordinà che tut ils 30 aviuns ston vegnir controllads. Plinavant vala ina restricziun per sgular: Ils F/A 18 ston sgular almain 1'000 meters sur il palantschieu.

11 aviuns èn controllads

Enfin uss ha il militar controllà las alettas d'atterrar dad 11 dals aviuns. Chattà han ins 15 scharniers cun stgarps. Kaj-Gunnar Sievert, pledader da l'autoritad d'armament, Armasuisse, ha confermà a Keystone-SDA ils rapports da las gasettas da Tamedia.

Quants dals aviuns controllads che hajan gì donns, n'ha il pledader betg pudì dir. Ma mintga aviun haja vid sias duas alettas d'atterrar mintgamai dus scharniers – pia quatter per aviun. Da quels possian tuts fin nagins avair donns.

Nagin urari

Enfin cura ch'ils ulteriurs 19 aviuns sajan controllads, na possian ins betg dir, ha declerà Sievert. Er avert saja fin cura ch'ils scharniers donnegiads possian vegnir remplazzads.

Pervi dals stgarps ha il militar er stuì desdir ina show planisada per ils 10 d'october sin l'Axalp. Preschentaziuns cun chanun da bord e demonstraziuns datiers dal palantschieu na pon ils aviuns betg far, enfin che las controllas èn serradas giu. Per il servetsch da polizia d'aria statan ils F/A 18 dentant a disposiziun.

Betg l'emprima giada

Quai n'è betg l'emprima giada ch'ins ha chattà stgarps vi dals aviuns: Gia l'entschatta favrer 2018 ha il militar stuì far il grounden ils aviuns per radund in mais. Lura avevan ins chattà stgarps vid ils ischels da las alas. Er là han ins controllà l'entira flotta.

Ils favrer da quest onn han ins constatà in stgarp vi da la part sura dal bist dad in dals aviuns. Er quai ha gì per consequenza ina controlla da tut ils aviuns. Ma là n'han ins chattà nagins ulteriurs stgarps.

RR novitads 15:00

Artitgels legids il pli savens