Siglir tar il cuntegn
Inhalt

Svizra Aviun militar svizzer croda en Frantscha

In aviun militar svizzer è crudà giu en la Frantscha durant in sgol da trenament. Il pilot ha pudì sa salvar cun il sez catapultabel el è blessà ed sa chatta en l'ospital.

restanzas da l'laviun en la terra
Legenda: Las investigaziuns da la gendarmaria franzosa continuescha enturn las restanzas da la F/A-18 ch'è crudada sper Glamondans (F). Keystone

L'accident è capità enturn las 11:30 da mezdi en la vischinanza da la vischnanca da Glamondans en l'ost da la citad da Besançon. Las raschuns n'èn anc betg enconuschentas. L'Uffizi federal da defensiun ha però scludì en ina conferenza da medias, ch'i pudessia sa tractar d'ina collisiun. Il pilot ha pudì sa salvar ed è en l'ospital. La regiun tutga tar il spazi che la Svizra a la Frantscha nizzegian communablamain per trenaments.

carta
Legenda: L'aviun è crudà en la vischinanza da Glamondans sper Besançon. google.maps

Sin sgol da trenament cun Tigers F-5

Partì era l'aviun da Payerne (VD) ed era permez in sgol da trenament ensemen cun 2 aviuns dal tip Tiger F-5, ha declerà il pledader da l'armada svizra Daniel Reist a radio SRF.

Pilot ordaifer privel da vita

Tenor indicaziuns da la prefectura franzosa «Doubs» è il pilot alerta ed i dettia nagin privel da vita. El sa chattia en l'ospital a Besançon.

Las investigaziuns da la gendarmaria franzosa e las autoritads svizras continueschian. Il prefect ed il procuratur publica sajan al lieu, communitgescha il departament da defensiun svizzer.

Betg l'emprima F/A-18 svizra che croda

Quai n'è betg l'emprima giada ch'in aviun F/A-18 svizra croda.

  • L'october 2013 era in aviun sfratgà en la paraid-crap ad Alpnachstad (OW). Là eran il pilot ed 1 passaschier morts. Tenor il rapport final dals investigaders era l'accident da lezzas uras capità, perquai ch'il pilot aveva valità sbaglià la situaziun.
  • Il 1998 era crudada ina F/A-18 sper Crans-sur-Sierre (VS). 2 schuldads eran morts tar l'accident. Las investigaziuns han constatà che l'accident na saja betg capità tras defects tecnics, mabain ch'il pilot saja probablamain stà desorientà.

RR novitads 14:00