Siglir tar il cuntegn
Aviun da cumbat svizzer dal tip F/A 18.
Legenda: Ils actual anc 30 F/A 18 da l'armada svizra cuntanschan en paucs onns la fin da lur durada da servetsch. Gia oz datti adina puspè problems cun stgarps e material da reserva ch'è adina pli grev d'organisar. Keystone

Aviuns da cumbat novs Pront per la votaziun

Il Parlament federal ha approvà la cumpra da novs aviuns da cumbat per maximal 6 milliardas francs. Suenter la votaziun finala da damaun e la publicaziun en il fegl uffizial da la Confederaziun pon ils adversaris rimnar suttascripziuns per il referendum.

Dispitaivel era la fin anc quant gronda che la cumpart sto esser da las fatschentas da cumpensaziun ch'il furnitur dals aviuns sto offrir ad interpresas svizras. Il Cussegl dals chantuns leva almain 80%, il Cussegl naziunal è suandà la proposta dal Cussegl federal e vuleva mo ina cumpensaziun da 60%. La conferenza d’intermediaziun da las duas chombras è lura sa cunvegnida sin 60%.

Votaziun il settember 2020

Tge aviun da cumbat che la Svizra vegn a cumprar n’è dentant anc betg decidì. Il mument èn quatter aviuns en la fasa d’evaluaziun. Il Cussegl federal vul decider pir suenter la votaziun da referendum che ha il pli probabel lieu ils 27 da settember da l’auter onn.

Che las Svizras ed ils Svizzers vegnan ad avair l’ultim pled tar la dumonda sche la Svizra duai cumprar novs aviuns da cumbat è tant sco segir. Las partidas sanestras han ensemen cun la Gruppa per ina Svizra senza armada gia annunzià da vulair prender il referendum cunter la decisiun da credit dal Parlament federal. Ch’ellas vegnan a pudair ramassar las 50'000 suttascripziuns enfin il mars nagin che dubita.

RTR actualitad 12:00

Artitgels legids il pli savens