Il sindicat da las persunas da transport scriva vinavant, che la Confederaziun promovia cun questa mesira ina concurrenza tar la viafier e quai malgrà las grondas investiziuns planisadas en la rait da viafier federala.
Critica dad «autogol» fin a tschuffentada
Cun laschar societads da trens da l'exteriur sin ils binaris svizzers vegnia concurrenzada la viafier federala e perquai saja quai in «autogol», scriva il sindicat.
Er ils verds crititgescha la decisiun dal Cussegl federal. Ils bus lontans tschufrognian massivamain l'aria, scriva la partida.
Lingias naziunalas da bus lontans gea – dentant tenor lescha vertenta
La gievgia aveva publitgà il Cussegl federal co ch'el vul liberalisar il traffic lontan. Uschia veglia el bain pussibilitar lingias naziunalas da bus lontans; quai dentant en il rom da las leschas vertentas. Las lingias naziunalas hajan da vegnir integradas en la rait dal traffic public ed ils manaschis da viadi hajan da sa tegnair vi da las leschas da lavur e da segirezza svizras.
El scriva plinavant, ch’ils manaschis da viadis duajan stuair acceptar abunaments generals e da quels da mezza taxa.
Vi dad in tema central na vul il Cussegl federal dentant naginas midadas: En Svizra na dastgan manaschis da bus da l’exteriur n’era en avegnir betg transportar passagiers.
Laschar l’auto en garascha ed ir cun il bus
Cun la liberalisaziun parziala spera il Cussegl federal en emprima lingia da persvader ils automobilists da prender il bus lontan e da distgargiar uschia il traffic sin via.
L’effect duai funcziunar sco «cumplettaziun tar singuls puncts» u là, nua ch’ils trens na porschian betg bunas colliaziuns tangenzialas.
Concurrenza da l’exteriur percunter sin binaris svizzers
Fertant ch’ils bus lontans na duajan betg concurrenzar ils trens en Svizra, duajan quels survegnir concurrenza directa sin ils binaris svizzers. Uschia spera il Cussegl federal che la purschida actuala vegnia meglra.
En pli duai questa liberalisaziun per societads da trens en Svizra er porscher il cuntrari – numnadamain che societads svizras pon er surprender lingias en l’exteriur. Quai n’era fin oz betg pussaivel.
RR novitads 11:00