Il Cussegl federal ha fixà las emprimas direcziuns dal project AVS2030. La refurma haja la finamira da stabilisar e modernisar l'Assicuranza per vegls e survivents, di il Cussegl federal a chaschun d'ina conferenza da medias. Finamiras èn era da segirar il niveau da las rentas, reparter ils custs dal svilup demografic e porscher impuls per lavurar vinavant suenter cuntanscher la vegliadetgna d'AVS. Enfin la fin da december 2026 ha il Cussegl federal da preschentar al parlament in project per stabilisar l'AVS dal 2030 fin 2040.
Marcantamain dapli pensiunaris e pensiunarias en 10 onns
Cunquai che la populaziun vegn pli veglia e la generaziun dals babyboomers vegn pensiunada ils onns che vegnan, vegnian ils custs per l'AVS a crescher marcantamain ils proxims 10 onns. Quai malgrà las refurmas gia applitgadas. Entant che radund 2,5 milliuns persunas survegnan ina renta d'AVS actualmain, vegnan quai ad esser il 2030 radund 2,8 milliuns e 2035 radund 3 milliuns. Era sche la cumpart da persunas che lavuran vegn er a crescher, na tanscha lezza cumpart betg per cumpensar.
Per cumpensar ils custs supplementars, vul il Cussegl federal augmentar las entradas per l'AVS or da las funtaunas existentas. Per quai incumbensescha el il Departament federal da l'intern d'examinar differentas mesiras. Ultra da quai vul il Cussegl federal examinar mecanissems d'intervenziun per il cas che la situaziun finanziala da l'AVS sa pegiurescha u che las decisiuns politicas na sajan betg avant maun ad uras.
Motivar da lavurar pli ditg
Vinavant vul el adattar l'AVS al svilup sozial ed economic. Quai cun promover l'engaschament da lavur da persunas che cuntanschan la vegliadetgna da referenza d'AVS. Uschia vul el schliar la vegliadetgna maximala da 70 onns en l'AVS, augmentar l'import liber e far main attractiv il pensiunament anticipà. Vinavant vegnan examinadas mesiras che pertutgan las prestaziuns e las contribuziuns sco era il cumbat cunter maldiever.
Nagina opziun è actualmain d'auzar la vegliadetgna da referanza. Il Cussegl federal desista era d'introducir novas funtaunas da finanziaziun sco per exempel ina taglia sin transacziuns da finanzas, taglia d'ierta u taglia sin gudogn da funs.
Co vai vinavant?
L'atun 2025 vegn il Cussegl federal a preschentar la directiva per l'AVS2030. Cumenzament dal 2026 duai il project lura ir en consultaziun.
Or da l'archiv: