Siglir tar il cuntegn

Svizra Avunda sang per tuts en Svizra

Onn per onn hai enfin ussa gì num: «Agid, nus avain memia pauc sang.» Ma il 2017 èsi stà auter – surprendentamain.

Purtret da satgs da sang mess ora en retschas.
Legenda: L'emprima giada dapi decennis ha la donaziun da sang tanschì questa stad. Keystone

L'emprima giada dapi onns hai gì questa stad avunda sang. Tar il servetsch da donaziun da la Crusch Cotschna che furnescha ils ospitals, hajan ins sfruschà ils egls.

Jau sun dapi pli che 20 onns qua e na poss betg ma regurdar dad ina tala stad sco questa.
Autur: Rudolf SchwabeDirectur servetsch da donaziun CC

La stad saja numnadamain tenor Rudolf Schwabe, il directur dal servetsch da donaziuns tar la Crusch Cotschna, adina il temp nua ch'il sang vegnia cnap. Ins dovria la stad numnadamain dapli sang. Plinavant sajan blers donaturs en vacanzas.

Ch'i ha da quest onn avunda sang per tuttas gruppas da sang haja tenor Schwabe dentant er da far cun appels intenziunads. «Quai ha manà tar quai che nus n'avain gì naginas stretgas.» Plinavant hajan ospitals duvrà per part pli pauc sang che la stad precedenta.

Be ina minoritad dat regularmain sang

Per ch'i tanschia vinavant da furnir avunda sang als ospitals dovri tenor Rudolf Schwabe radund 1'000 donaziuns a di – da gruppas da sang raras sco era da las gruppas pli usitadas. Malgrà las radund 300'000 donaziuns n'è questa finamira betg vegnida cuntanschida l'onn passà. Co i vegn a guardar ora il 2017 n'è anc betg cler. Ma las reservas da sang sajan pli grondas che anc avant 12 mais.

Tuttina na possia la donaziun da sang betg far pausa. Ella è avisada sin novs donaturs. La finala dat mo ina minoritad en Svizra regularmain sang.

RR novitads 12:00