Axpo fa perdita da 1,25 milliardas

La raschun principala è ina rectificaziun da valur dad 1,6 milliardas francs.

Purtret d'ina chautscha da lavur cun scrit si Axpo Linthal 2015 Bild in Lightbox öffnen.

Legenda da maletgs: L'ovra electrica Linth-Limmern è sco para il motiv per las grondas ratificaziuns. Keystone

In terz da questa rectificaziun è da manar enavos sin l'implant da pumpadi Linth-Limmern. Cun la perdita da 1,25 milliardas scriva l'Axpo il mender resultat en l'istorgia da la fatschenta. Gia l'onn avant aveva quai dà in minus da 990 milliuns francs medemamain pervi da rectificaziuns.

Il resultat da gestiun avant avair tratg giu expensas numna l'Axpo cun 637 milliuns francs plaschaivel. Quai dentant resguardond las grevas cundiziuns al martgà. Dentant giascha er quest resultat sut quel da l'onn passà da 834 milliuns.

Novs investiders per novas sfidas

Plinavant ha Axpo annunzià da vulair ir per novs investiders per l'onn 2019. La fatschenta desistia uss dentant da vulair vender ovras electricas. Ils novs investiders duain sa participar ad ina partiziun nova. Questa partiziun duai cumpigliar la producziun d'energia da funtaunas regenerablas, la fatschenta cun clients da l'exteriur e la commerzialisaziun.

Midadas er tar il cussegl d'administraziun

Il cussegl d'administraziun dal concern d'energia svizzer Axpo duai vegnir pli pitschen e sa cumponer senza politichers. Il president dal cussegl d'administraziun Thomas Sieber ha ditg avant las medias che questa midada saja decisiva.

Concretamain datti trais midadas en il gremi: en l'avegnir na duai dar nagins represchentants d'ovras chantunalas pli, nagins cussegliers guvernativs ed il cussegl d'administraziun duai vegnir reducì da 13 sin 9 commembers.

RR novitads 08:00