Il concern d'energia svizzer Axpo scriva giu 1,2 milliardas francs per quest onn. Las rectificaziuns da la valur pertutgian tant ses implants electrics en Svizra ed en l'exteriur sco er contracts da retrair energia cun ovras atomaras franzosas.
D'attribuir sajan questas mesiras als bass pretschs dal commerzi a l'engrossa e pervia dal ferm franc svizzer, sco l'Axpo communitgescha. Per quest onn quinta il concern che la svieuta sa sminuescha per 15%. Er quinta el cun ina sperdita.
