Siglir tar il cuntegn

Header

cuntegn

Svizra Axpo venda chastè da Böttstein

Ina persuna privata cumpra da l'Axpo il chastè da Böttstein en il chantun Argovia. Davart il pretsch da cumpra dal chastè ed il num dal cumprader na dettia naginas infurmaziuns. Quai ha communitgà il concern d'energia Axpo.

Scrit ora da vender il chastè ha l'Axpo gia l'entschatta mars 2016. Dapi l'entschatta fanadur 2017 tutga il chastè da Böttstein ussa ad ina persuna privata ord la regiun da Turitg.

Nov possessur

Il nov possessur haja experientscha da plirs onns en la gastronomia e hotellaria, scriva l'Axpo. Dapi passa 40 onns hai ussa in hotel ed in restaurant en il chastè da Böttstein. Ed il nov possessur haja garantì, ch'il hotel ed il restaurant restia e ch'il persunal possia lavurar vinavant là.

Chastè Böttstein

Il chastè e la chaplutta stattan sut protecziun da monuments. Sin quest areal deva quai schon en il 11avel tschientaner in chastè. L'edifizi dad oz cun chasa signurila e chaplutta èn vegnids construids tranter 1615 e 1617. Il chastè tutgava blers onns a la famiglia Schmid.

Strategia Axpo

Cun la vendita dal chastè da Böttstein realisescha l'Axpo sia strategia da sa separar da bajetgs betg impurtants. Cumprà il chastè da Böttstein aveva l'antecessura da l'Axpo – la NOK – l'onn 1964 en connex cun la construcziun da l'ovra atomara Beznau.

RR novitads 12:00

Artitgels legids il pli savens