Per la Svizra ed il Principadi da Liechtenstein ha l'Uffizi federal da sanadad annunzià la gievgia 364 novs cas da Covid-19. La mesemna eran vegnids registrads 370 novas infecziuns ed ils dus dis avant 216 e 163. Dapi l'entschatta da la pandemia hai en tut dà 43'127 infecziuns cun il coronavirus ch'èn vegnidas confermadas da labors.
Cumpareglià cun la mesemna èn la gievgia 11 persunas dapli ospitalisadas pervi da Covid-19. Dapi l'entschatta da la pandemia èn uschia vegnidas tractadas en l'ospital 4'570 persunas pervi dal coronavirus. Il dumber da mortoris en connex cun il virus è creschì per trais sin 1'730.
Passa la mesadad dals cas en trais chantuns
En il rapport da situaziun per l'emna 35 (24 fin 30 d'avust) scriva il BAG, che 11 da 26 chantuns hajan registrà dapli infecziuns che l'emna avant. Il dumber da las infecziuns cun il coronavirus saja dapi la fin da zercladur mintg'emna tendenzialmain creschent.
Ils trais chantuns Genevra, Turitg e Vad hajan annunzià durant las emnas 34 e 35 passa la mesadad da tut las novas infecziuns en Svizra: 57% en l'emna 34 e 60% en l'emna 35.
2 novs cas en Grischun
Il Grischun annunzia la gievgia dus novs cas da Covid-19. En isolaziun sa chattan actualmain 21 persunas ed en quarantina 54. Ina persuna vegn tgirada en l'ospital pervi dal coronavirus. Dapi l'entschatta da la pandemia èn vegnids confermads da labors 1'005 cas en Grischun e 50 persunas èn mortas en connex cun Covid-19.
