Siglir tar il cuntegn

Header

cuntegn

BAG cunter task force Task force da corona propona in sisem dad ampla

In sistem d'alarm duai gidar a vegnir a frida meglier cun la pandemia da corona. La task force da la Confederaziun propona perquai in plan da stgalim che prevesa tschertas mesiras tenor il svilup da la situaziun. Quai rapporta Radio SRF.

Cun in tal sistem na stuessan mesiras betg pir vegnir discutadas, cura ch'il dumber da novas infecziuns è gia ferm creschent. Las mesiras fissan numnadamain gia fixadas e la publicitad e las interpresas savessan a temp, tge che als spetga. Auters pajais enconuschan gia in tal sistem, nua ch'in'ampla mida da verd sin oransch u cotschen, tut tenor tge stgalim ch'il dumber d'infecziuns cuntanscha.

Dubis che la populaziun avess chapientscha

Ils medis chantunals e l'Uffizi federal per sanadad BAG na tegnan dentant enfin uss betg bler da quest'idea. Els emprovian da vesair l'entira situaziun e da reagir cun mesiras adequatas. Quai na saja betg propi pussaivel dad integrar en in sistem dad ampla, ha ditg il medi chantunal da Basilea-Citad il mardi a la conferenza da medias da la Confederaziun. Tenor el n'avess nagin chapì, sch'igl avess gia la stad dà mesiras pli severas causa in sistem dad ampla.

Reagir a temp fiss e betg spetgar sin schoc

Matthias Egger da la task force da la Confederaziun vesa quai dentant in pau auter. Tenor el ha la Svizra manchentà da mantegnair il bonus ch'era vegnì cuntanschì cun il lockdown. Gia la stad saja quel vegnì duvrà si e la Svizra saja perquai daventada fitg vulnerabla per la segunda unda. Tenor Egger fissi perquai meglier da reagir a temp cun mesiras pli severas, enstagl dad avair pli tard in schoc.

RTR novitads 08:00

Artitgels legids il pli savens

Scrollar a sanestra Scrollar a dretga