Per la segunda giada ha il club da ballape Rumantschia giugà cunter ils politichers dal club da ballape Cussegl naziunal. Questa giada avant ina culissa unica en il stadion da chasa dals Young Boys, il Wankdorf a Berna. Avant quatter onns avevan las duas equipas dà pari, 1:1. Tant il CB Rumantschia sco era ils indigens dal CB Cussegl naziunal vulevan perquai questa giada bandunar la plazza cun in success.
Las spetgas da vart rumantscha eran grondas.
Jau hai in bun sentiment. Jau sun mirvegliusa tge che quai dat ed jau ma legrel sin quai gieu.
Plaschair da giugar ensemen avevan era ils giugaders da la Chasa federala.
Nus essan preparads e nus prendain fitg serius la chaussa. Ma nus guardain era d’avair in bun temp. Da giugar cunter il CB Rumantschia è ina gronda onur per nus.
Suenter ina foto da regurdientscha ha la partida d'amicizia cumenzà. L'emprima mesadad era pulit equilibrada. Omaduas equipas avevan schanzas, ma suenter 35 minutas era il resultat intermediar anc adina nulla cunter nulla.
Temp per sa stgaudar in zic, il termometer mussava minus dus grads, e da reponderar la strategia. Il CB Cussegl naziunal ha fatg midadas ed ha purtà sia arma secreta per la segunda mesadad. In rumantsch, Jon Pult.
Jau hai da mussar a mes cumpogns da squadra dal CB Cussegl naziunal ch’jau sun propi in giugader dad els e ch’jau na sun betg il chaval da Troja da la Rumantschia.
Ils da la Chasa federala èn stads da buna speranza. Ma propi squitsch han ils rumantschs fatg, e quai cun success. Amez la segunda mesadad è il CB Rumantschia ì en avantatg dus a nulla. Quai ha dentant sveglià las forzas dals indigens. Ina curta malsegirtad en la defensiun rumantscha ed il CB Cussegl naziunal ha pudì reducir sin dus ad in. E quai è lura era stà il resultat final.