Siglir tar il cuntegn

Header

fassada da la banca naziunala
Legenda: A la Banca naziunala Svizra vegn renfatschà d'avair cuntrafatg a las directivas per investiziuns. Keystone
cuntegn

Svizra Banca naziunala haja investì en producents d'armas atomaras

La Banca naziunala Svizra duai avair investì passa 607 milliuns dollars en interpresas che produceschan armas atomaras. Quai resulta d'in studi da l’organisaziun da pasch ollandaisa PAX.

En ses rapport «Dont' Bank on the Bomb» (betg far fatschentas cun bumbas) publitgescha l'organisaziun da pasch ollandaisa PAX mintg'onn las firmas ch'investeschan en interpresas che produceschan armas atomaras. La Banca naziunala svizra na figurescha bain betg en il rapport uffizial. A las gasettas «Tages-Anzeiger» e «Der Bund» han ils auturs dal studi però dà las cifras e publitgà participaziuns da la Banca naziunala Svizra.

607,5 milliuns dollars en 14 differentas firmas

Tenor lezs ha la Banca naziunala investì 607,52 milliuns dollars en 14 differentas firmas ch'èn participadas vid la producziun d'armas atomaras. Tenor ils auturs na figurava la BNS betg sin la glista en il rapport uffizial, perquai ch'ella na surpassia betg la limita per vegnir numnada.

Critica massiva era en Svizra

La PAX, la gruppa per ina Svizra senz'armada (GSoA) e la campagna internaziunala per l'aboliziun d'armas atomaras (ICAN) renfatschan a la BNS ch'ella provia da guntgir las directivas. Las directivas per investiziuns da la BNS pretendan numnadamain da desister d'investiziuns en firmas

  • che produceschan armas bandegiadas internaziunalmain
  • che cuntrafan massivamain a dretgs umans elementars
  • che chaschunan sistematicamain donns da l'ambient gravants

Banca naziunala tascha

La Banca naziunala Svizra n'ha betg vulì prender posiziun davart las cifras actualas dal studi «Don't Bank on the Bomb». En il passà aveva la BNS adina puspè fatg valair ch'i dettia differentas interpretaziuns per il term «products bandegiads».

RR novitads 12:00

Artitgels legids il pli savens

Scrollar a sanestra Scrollar a dretga