Ils plans en in cas da Brexit ha annunzià il schef da la banca naziunala Thomas Jordan. Ins saja preparà sin las turbulenzas ch'i pudess dar suenter il referendum ils 23 da zercladur.
Blers investiders èn preoccupads pervi da las consequenzas betg cleras d’in Brexit e fugian perquai en investiziuns stabilas sco il franc svizzer. Las bancas grondas svizras han augmentà ils ultims 12 mais lur reservas. A la Banca naziunala svizra na tanscha quai dentant betg.
Bancas grondas dovran dapli chapital fin il 2020
La Banca naziunala svizra pretenda da las bancas grondas da prender ulteriuras mesiras. In basegn d'agir vesa la Banca naziunala cunzunt tar la quota d'indebitament – uschenumnada «Leverage Ratio» –, sco era tar las preparativas d'in eventual bancrut.
En omadus puncts adempleschian las bancas UBS e CS las pretensiuns actualas. I dovria dentant ulteriuras mesiras per ademplir las pretensiuns da la lescha pli severa da «Too big to fail». Quai scriva la banca naziunala.
RR novitads 10:00 / 18:00