Siglir tar il cuntegn
Inhalt

Svizra Banca naziunala scriva gudogn da passa 21 milliardas

La Banca naziunala svizra ha fatg in gudogn da 21,3 milliardas francs l'emprim mez onn dal 2016. Avant in onn guardava quai anc ora tut auter: Suenter l'aboliziun dal curs minimal da l'euro aveva la banca preschentà ina perdita da record.

La Banca naziunala svizra.
Legenda: Il medem temp da l'onn avant aveva la banca anc fatg ina perdita da record da passa 50 milliardas. Keystone

La raschun per il gudogn è d'ina vart il gudogn cun curs da stgomi da 13 milliardas francs, da l'autra vart ha la banca profità da la valur augmentada da l'aur. Sias reservas d'aur han contribuì ad in gudogn da 7,6 milliardas francs.

Tschains negativs portan prest 700 milliuns

Contribuì al gudogn han per er ils tschains negativs. Or dals tschains da chastis che la banca incassescha sin dabuns da contos da giro da bancas commerzialas èsi sa resultà in plus da 692 milliuns francs.

Il medem temp da l’onn avant aveva la banca anc fatg ina perdita da record da 50,1 milliardas, quai suenter l’aboliziun dal curs minimal da l’euro. Per flaivlentar il frac aveva la banca intervegnì sin il martgà da devisas. Il resultat da la banca naziunala dependa per gronda part da ses portolio da valutas estras da radund 600 milliardas francs.

RR novtads 08:00