Banca naziunala svizra - Activistas dal clima han dominà a la radunanza generala
Pliras activistas ed activists han prendì posiziun durant la radunanza generala da la Banca naziunala svizra. Crititgà è vegnida la politica d'investiziuns. La BNS stoppia resguardar pli fitg il clima.
La Banca naziunala svizra è vegnida sut squitsch en la dumonda dal clima. Activistas ed activists da l’Allianza dal clima han ordavant cumprà aczias da la banca per pudair plazzar lur pretensiuns a la radunanza generala. Uschia na duai la BNS betg pli investir en firmas che han da far cun carburants fossils.
Legenda:
Hilda Flavia Nakabuye, in'activista dal clima, ha pledà per che la Banca naziunala svizra chalia d'investir en carburants fossils.
Keystone
Il president da la banca Thomas Jordan ha ditg che la BNS emprovia da chapir ils activists, dentant quels duain era empruvar da chapir la banca. La banca haja numnadamain il mandat principal da garantir la stabilitad dal pretsch. E quel stoppia star en il center da las decisiuns da la banca, e na duain betg vegnir en concurrenza cun autras finamiras sco la protecziun dal clima.
Davart la strategia e l'economia svizra:
Avrir la boxSerrar la box
Suenter il collaps da la banca Credit Suisse vul la BNS pli strictas prescripziuns. «La regulaziun e la surveglianza da las bancas ston vegnir examinadas», ha Thomas Jordan ditg a la radunanza generala. El pledescha per ina «concurrenza sauna» en il sectur da bancas. Quai saja er en l'interess da la nova banca gronda.
La valur da las immobiglias è creschida. Perquai han las possessuras èn Svizra fatg gudogn. La valur è creschida per 6,2%, sin en tut 2'550 milliardas francs.
Las autras facultads da las persunas da la Svizra èn en tut dentant sa reducidas levet. En tut per 2,1%, tge che giascha cunzunt vi dal svilup schlet a la bursa, tenor la Banca naziunala svizra.
Plinavant vul la Banca naziunala augmentar ses agen chapital. Quai haja prioritad avant da distribuir gudogns a la Confederaziun ed als chantuns.
Il clima saja dentant in tema impurtant era per la BNS. Uschia han ins reducì investiziuns en charvun. E la banca fa era part dal «Network for Greening the Financial System».
audio
Banca naziunala n'haja betg ina strategia d'ecologia, hai gì num
03:15 min, ord Actualitad dals 28.04.2023.
Maletg: Keystone
