Siglir tar il cuntegn

Header

cuntegn

Banca naziunala svizra Barbara Janom Steiner: «Mintgatant survegn jau prest pes fraids»

Pli che pronta è la dunna da 56 onns per ses nov uffizi. Suenter 4 mais da pausa è Barbara Janom Steiner pli che cuntenta da cumenzar la nova sfida sco presidenta dal cussegl da banca SNB. Dentant era il midament da la regenza en ina nova fasa da vita betg uschè simpel.

audio
Saira: Barbara Janom Steiner avant sia nova incumbensa
ord Actualitad dals 26.04.2019.
laschar ir. Durada: 3 minutas 56 Secundas.

Da 150 sin 0

Barbara Janom Steiner è ina dunna ch' è gugent sin «zac». Perquai n'era il midament suenter 10 onns sco cussegliera guvernativa betg uschè simpel: «Igl era in midament da 150% sin 0», di Janom Steiner. L'emprim haja ella gì il sentiment ch'ella haja vacanzas. Suenter in temp haja ella però badà che quest saja uss propi in midament pli grond - ina nova fasa da vita.

Il matg cumenza la dunna, oriunda da Scuol, ses nov uffizi cun in pensum da 40 fin 50%. Il Cussegl federal aveva elegì ella il settember sco successura da Jean Studer. Il gremi enconuscha Janom Steiner dentant già, perquai che ella è dapli il 2015 commembra dal cussegl da banca.

Sche jau n' avess betg gì il presidi dal cussegl da banca en vista, sco nova sfida, fiss quai stà fitg grev per mai.
Autur: Barbara Janom Steiner Presidenta cussegl da banca SNB ed anteriura cussegliera guvernativa

Barbara Janom Steiner vul dentant lavurar 100%. Perquai vul ella emplenir ils pertschients che restan cun mandats en cussegls d'administraziun. Intginas dumondas haja ella survegnì, dentant n'haja ella anc decis tgenins mandats che ella veglia surpigliar.

Betg mo prestige

Il cussegl da banca è il gremi che ha da survegliar la direcziun da la banca naziunala svizra. Il mandat n'è betg mo in uffizi da prestige - igl è in mandat cun blera responsabladad. Mintgatant survegnia ella in tic pes fraids, di l'anteriura ministra da finanzas dal chantun Grischun. Ma ella s'allegria ferm e sappia che ella haja in team che sa sustegnia vicendaivlamain.

Incumbensa dal cussegl da banca

Avrir la box Serrar la box

Il cussegl da banca da la banca naziunala ha da survegliar e controllar la direcziun da la banca naziunala che lezza sa tegnia vid las leschas, ils reglaments e las ordinaziuns. Il cussegl ha 11 commembers, da quels elegia il Cussegl federal sis e la radunanza generala tschintg.

l'ultima radunanza generala per Jean Studer

Dapi 12 onns è Studer commember dal cussegl da banca, da quai set onns sco president. Durant quest temp ha el, tranter auter, stuì dumagnar la crisa da finanzas il 2008 e plinavant la crisa dal euro. L'anteriur cusseglier guvernativ da Neuchâtel ha demissiunà sin fundament da la limita dal temp d'uffizi.

President dal directori da la Banca naziunala svizra resta vinavant Thomas Jordan.

Restar independenta per avair success

Sche la banca saja memia absorbada da la politica lura na possia la Banca naziunala betg pli agir en l’interess da l’entir pajais, ha ditg Jean Studer, il president partent da la banca, a la radunanza generala.

Il pendant a l'independenza saja dentant l'obligaziun da la Banca naziunala, d'infurmar davart ses agir e da dar pled e fatg schebain ella adempleschia ses pensums, ha ditg Studer vinavant.

RR novitads 11:00

Artitgels legids il pli savens