Siglir tar il cuntegn

Header

cuntegn

Banca naziunala svizra Economs crititgeschan transparenza manglusa

Ina gruppa d'economs pretenda dapli transparenza da la Banca naziunala svizra, en connex cun sias decisiuns geopoliticas.

Cumpareglià internaziunalmain, saja la Banca naziunala svizra ina da las pli independentas bancas centralas, scrivan ils trais professurs en lur rapport. En connex cun la transparenza – che saja ina premissa per l'obligaziun da render quint – saja la BNS sin la glista actuala sin in dals ultims plazs.

Directori duai vegnir engrondì

Ils experts d'economia pretendan che la BNS fetschia enconuschent sias decisiuns geopoliticas e prendia er en mira da declerar alternativas d'agir. Plinavant duai ella er far pli transparent las infurmaziuns davart las opiniuns en il directori. Ils trais economs, Stefan Gerlach, Yvan Lengwiler e Charles Wyploszwird èn er da l'avis ch'i fetschia senn d'engrondir quest gremi da trais chaus. La grondezza saja decisiva per la profunditad da sa cussegliar ed er per daventar pli robust. Er crititgà vegn il temp d'uffizi dals commembers dal directori.

BNS na vesa nagin basegn per midadas

La BNS ha declerà che lur moda da guvernar saja sa cumprovada. Quai vesian ins vid quai che la banca haja ademplì bain ses pensum malgrà disturbis externs. La stabilitad a pretschs hajan ins pudì garantir sco nagin auter pajais ed il svilup economic saja stà bun en cumparegliaziun internaziunala. La Banca naziunala decleria plinavant regularmain lur politica monetara en communicaziuns da pressa, conferenzas da pressa, il carnet da quartal, il rapport dal rendaquint sco er pleds ed intervistas. La BNS stettia en in dialog intensiv cun differentas gruppas da la populaziun, da la politica e da l'economia, cun la finamira da far chapibel e transparent la politica monetara.

audio
Per tadlar: las novitads da las 06:00
aus RTR Audio vom 14.04.2022.
abspielen. Laufzeit 4 minutas 44 Sekunden.

RTR novitads 06:00

Artitgels legids il pli savens

Scrollar a sanestra Scrollar a dretga