Sia demissiun haja da far cun in sbagl ch'el haja fatg en connex cun ina relaziun d'amur ch'el haja gì avant intgins onns e terminà sez, ha Lachappelle declerà la gievgia davant las medias. Quella dunna haja suenter però adina puspè tschertgà sia vischinanza.
Quest'emna haja la dunna denunzià el tar la procura publica pervi d'in mail intern ch'el aveva surlaschà ad ella il 2017, durant ses temp tar la Banca chantunala da Basilea. Tema dal mail era la transfurmaziun interna da la banca. Avant che daventar avant dus onns e mez president dal cussegl administrativ da la Raiffeisen era Lachappelle schef da la Banca chantunala da Basilea.
Lachapelle va or da quai ch'el n'haja fatg nagut che fiss da relevanza penala. Sut l'aspect da l'integritad na saja ses agir dentant betg perdunabel. Davant las medias è el sa perstgisà tar tut las interpresas, nua ch'el ha gì funcziuns sco er tar sia famiglia.
