A partir dals 7 da fanadur 2020 saja be pli pussaivel d'empustar las novas cartas da Mastercard, ha communitgà la Credit Suisse. Las cartas veglias da Maestro svaneschan uschia pass per pass. Clients cun ina carta da Maestro survegnan tenor la banca lura la nova, cura che la veglia curra giu.
La differenza tranter la carta da Maestro e la nova Mastercard saja ch'ins possia cun la nova carta era pajar online e per apps. Per garantir la segirezza lavura la banca cun «3D Secure» ch'è in sistem da verificaziun. Qua ston ils clients approvar il pajament cun il telefonin.
Cun las novas cartas saja plinavant er pussaivel da pajar senza contact e sco usità en Svizra saja pussaivel da pajar fin 80 francs senza dar en in PIN. Il pajament vegnia prendì giu dal conto direct sco usità tar cartas da debit. E da nov na dettia nagina taxa pli per pajaments fatgs en l'exteriur.
