Siglir tar il cuntegn

Header

video
Ina bar da linguas a Turitg: Er Rumantschs èn da la partida
Or da Telesguard dals 08.02.2017.
laschar ir. Durada: 2 minutas 59 Secundas.
cuntegn

Svizra Bar da linguas a Turitg - da nov cun maisa rumantscha

La bar da linguas porscha dapi sis onns ina giada al mais la pussaivladad da trenar e rinfrestgar il lungatg ester ch'ins ha ina giada emprendì. Da nov ha quella a Turitg er ina maisa rumantscha, sper ina franzosa, englaisa ed ina spagnola.

Mardi saira, ils 7 da favrer, èn sa rimnadas bun 20 persunas en in'ustaria datiers da la staziun principala da Turitg. Vid quatter maisas, mintgamai cun la bandiera da la lingua, vegn discurrì da quai e da tschai, adina en la lingua estra.

La maisa rumantscha - ina maisa multifara

A la maisa rumantscha sesan tranter auter Henning Hanson, oriund da Stockholm, Svetlana Munderich, oriunda da la Russia, e Verena Buralli da Turitg. Ils ins èn simplamain stads fascinads da la lingua rumantscha, auters sco Verena Buralli han emprendì ina giada rumantsch, perquai ch'els han ina chasa da vacanzas en il Grischun. Uss nizzegian tuts la Bar da linguas per exercitar regularmain quai ch'els han emprendì.

Sustegn da l'Uniun da las Rumantschas e dals Rumantschs en la Bassa

Accumpagnads vegnan ils giasts a la maisa rumantscha da Ciril Berther da l'Uniun da las Rumantschas e dals Rumantschs en la Bassa (URB). El è fascinà dal fatg, ch'ina lingua uschè pitschna sco il rumantsch chatta l'interess sin l'entir mund.

Maisa rumantscha ha salvà la bar da linguas

Inizià la maisa rumantscha ha la fundatura da la Bar da linguas, Verena Schoch, persunalmain. Cura ch'ella ha vis, ch'il dumber da giasts da las autras linguas sco spagnol, englais u franzos gieva enavos, ha ella pensà vid ils blers Grischuns e Rumantschs a Turitg. L'URB saja lura er stada intgantada da la dumonda da sa participar a la Bar da linguas.

Uschia ha la maisa rumantscha salvà la Bar da linguas a Turitg e tut tgi che vul po er vinavant vegnir ina giada al mais a discurrer englais, franzos, spagnol u er rumantsch.

RR actualitad 12:00

Artitgels legids il pli savens