Sin ils lais svizzers hai adina dapli glieud. Oravant tut il Stand Up Paddling vegn adina pli popular. A Genevra sto la polizia accumpagnar la bartga da passagiers e far ir davent la glieud per ch'i na dettia naginas collisiuns. Quai na saja dentant betg la soluziun, che la polizia stoppia accumpagnar las bartgas.
Perquai vegn empruvà da sensibilisar dapli las persunas ch'ina bartga da 50 meters na po betg simplamain fermar tuttenina. Tenor Barbla Etter n'èsi betg l'idea da lavurar cun scumonds, per entant sa mussa la prevenziun sco soluziun pli adattada. La glieud stoppia vegnir pli conscienta dals privels per ch'i na dettia nagins accidents ni conflicts sin ils lais.
Motors electrics anc rars sin ils lais svizzers
Tschertas bartgettas cun motors electrics èn d'inscuntrar sin ils lais svizzers. Per exempel han las bartgas a vela adina pli savens in motor electric che gida a las bartgas dad ir en il port. Ma i saja schon uschia ch'en Svizra haja blera glieud blers raps, e quels veglian ina bartga gronda cun in motor ferm. E qua n'è il svilup anc betg uschè enavant. Il motor sez bainschi, dentant fiss la battaria bler memia gronda e greva per ina tala prestaziun.
Barbla Etter è dentant persvasa ch'i dat en ils proxims 10 enfin 15 onns in grond svilup en quest sectur, e ch’ins vegn ad inscuntrar adina dapli bartgas cun motors electrics sin ils lais svizzers.
