Siglir tar il cuntegn

Header

cuntegn

«Barometer buna lavur» Lavurants pli e pli malcuntents cun cundiziuns da lavur

Quitads per la plazza da lavur, dapli stress e pressiun, strusch purschidas da perfecziunament ed ina paja che stagnescha. Lavureras e lavurers en Svizra èn adina pli malcuntents cun las cundiziuns da lavur. Quai demussa in studi da l'organisaziun tetgala dals lavurers, Travail.Suisse.

Sut «buna lavur» chapeschan ils auturs dal studi ina «lavur persistenta», che protegia la sanadad, mantegna la motivaziun e porschia ina tscherta segirezza. Ma en tuttas trais domenas sajan ils resultats pli bass che durant ils onns avant, ha communitgà Travail.Suisse. Da questa retschertga represchentativa cun il num «barometer buna lavur» haja la mesadad dals 20 criteris cuntanschì il pli bass stan dals davos 5 onns.

Lavurers èn stressads

42,3% dals lavurers sa sentan savens u fitg savens stressads entras la lavur. Quai è in augment da 2,3 puncts procentuals cumpareglià cun l'onn avant. Plinavant fan adina dapli lavurers quitads per lur plazza da lavur.

Pajas stagneschan

Er las pajas che stagneschan han laschà enavos fastizs. Uschia èn 12,4% dals dumandads da l'avis che lur paja na correspundia betg pli al basegn, quai èn 3 puncts procentuals dapli ch'il 2016. Ed er tar la cumpatibilitad da professiun e vita privata ha mintga quart problems, quai èn 4,5% dapli ch'il 2015.

Memia pauca chaschun per perfecziunament

A blers lavurers manca cumplet la pussaivladad da sa scolar enavant, entras il patrun. Mintga terz n'ha fatg l'ultim onn nagina scolaziun. 41,9% da quels che han gì la chaschun da sa scolar, han survegnì pajà cumplettamain la scolaziun entras il patrun ed han era gì dal temp nà il sustegn cumplain dal patrun. In quart ha dentant survegnì u nagin u be in sustegn parzial dal patrun.

RR novitads 10:00