Siglir tar il cuntegn

Header

audio
Analisa dals temas dominants
Or da Actualitad dals 15.10.2021.
abspielen. Laufzeit 4 minutas 29 Sekunden.
cuntegn

Barometer d'elecziuns Pussanza da partidas: Trais cumbattan per plaz trais

Avant dus onns ha la Svizra elegì il parlament federal ed en dus onns èsi puspè d'eleger Cussegl naziunal e Cussegl dals chantuns. Amez la legislatura èsi perquai temp da far bilantscha.

Malgrà a la pandemia è la situaziun politica en Svizra fitg stabila. Quai mussa la segund'analisa che l'institut da perscrutaziun Sotomo ha fatg sin incumbensa da la SRG SSR.

Tar las partidas grondas na datti betg grondas midadas: La Partida populara Svizra resta la pli ferma partida cun in pitschen gudogn dad 1%. La Partida socialdemocratica, la Partida liberaldemocratica e l'Allianza dal Center perdan tranter 0,5 ed 1,5%. Perencunter gudogna la Partida verd-liberala 2%.

Cumbat per il terz plaz

L'Allianza dal Center, la Partida liberaldemocratica ed ils Verds han tuttas radund 13% da las vuschs. La gronda differenza tranter quellas trais partidas è il dumber da cussegliers federals: La PLD ha dus, l'AdC in ed ils Verds n'han nagin.

audio
Barometer d'elecziun – cumbat per terza posiziun
aus Actualitad vom 15.10.2021.
abspielen. Laufzeit 4 minutas 2 Sekunden.

Clima pli impurtant che la pandemia

Ils temas ch'occupeschan votants e votantas restan la midada dal clima (44%) ed il cumbat da la pandemia da Covid-19 (32%). En connex cun las mesiras cunter corona dal Cussegl federal èn ils dretgs da libertad (17%) in nov aspect impurtant. Els èn vegnids numnads quasi uschè savens sco la segirtad sociala (18%).

Ils dretgs da libertad èn spezialmain impurtants per la PPS, che ha uschia chattà in tema che po cumpensar ses temas tradiziunals sco la relaziun cun l'Uniun Europeica e l'immigraziun. Quels temas han pers impurtanza tar ils votants e las votantas.

Temas socials ed economics han pers impurtanza

Avant dus onns eran la situaziun economia e la dischoccupaziun temas centrals. Quai na para uss dentant betg pli da fatschentar la populaziun. Il medem vala per las premias da las cassas da malsauns, quellas èn crudadas da 43% sin 14%.

Quai sa mussa er tar ils resultats da las partidas: L'economia e fatgs socials èn ils temas principals da la PLD e da la PS. Il medem mument vegn la midada dal clima pli impurtant e da quai profiteschan las partidas verdas.

Detagls da l'enquista

Avrir la box Serrar la box

L'enquista ha l'institut da perscrutaziun Sotomo fatg sin incumbensa da la SRG SSR e quai tranter ils 29 da settember ed ils 3 d'october. En total èn 27'976 persunas sa participadas (23'611 en Svizra tudestga, 3'828 en Svizra franzosa e 537 en Svizra taliana).

La quota da sbagl è tar +/- 1,3 puncts procentuals.

RTR novitads 17:00

Artitgels legids il pli savens

Scrollar a sanestra Scrollar a dretga