Barometer da conjunctura 2020 - Prevista per l'economia svizra è in zic meglra
La prognosa per la conjunctura svizra per l'entschatta dal 2020 sa meglierescha, dentant resta ella modesta. Il barometer da conjunctura dal KOF cuntanscha il december il medem stan sco la fin da l'onn passà. Quai suenter ch'el è anc ina giada s'auzà pulit la fin da quest onn.
L'indicatur è s'auzà per 3,8 puncts sin 96,4 puncts. Il barometer giascha dentant anc adina sut la media a lunga vista, ha communitgà l'Institut da perscrutaziun da la conjunctura KOF, da l'ETH Turitg. La prognosa per la Svizra saja cun quai vegnida «in zic» meglra.
Per l'augment dal december èn responsabels tenor KOF, sur tut indicaturs da l'industria. En la branscha da mastergns elavurants sajan sur tut las prognosas per l'electroindustria sa meglieradas. Meglra saja er la prognosa per las spartas da «palpiri e stampa» sco era «metal e lain». Las prognosas per l'industria da maschinas e quella dals producents da mangiativas e l'industria da textilias sajan dentant restadas medemas.
Il barometer da conjunctura dal KOF
Avrir la boxSerrar la box
Il barometer da conjunctura dal KOF è in indicatur tempriv per il svilup da la conjunctura svizra. I sa tracta d'ina collecziun d'indicaturs che consistan d'in dumber d'indicaturs singuls che vegnan mess ensemen. Quels vegnan valitads tenor pais statistic e resumads tar in indicatur general.
