Be la mesadad da las giuvnas e giuvens tranter 15 e 26 onns èn anc plitost positivs en connex cun lur agen avegnir. Quai mussa la retschertga represchentativa «Barometer da giuvenils» fatga per incumbensa da la banca Credit Suisse. Anc avant dus onns guardavan passa 60% dals giuvenils positivamain en l'avegnir.
Ils pli gronds quitads fetschian ils giuvenils en connex cun il provediment per la vegliadetgna sco p. ex. las rentas. Sco segund e terz grond quità suondan la pandemia da corona e la protecziun da l'ambient. En nagin auter pajais saja il tema dal viver en la vegliadetgna uschè preschents sco en Svizra. Giuvens e giuvnas svizras sustegnan da princpi però il sistem existent nua ch'ils giuvens che lavuran finanzieschan la pensiun dals pli vegls.
Sper la Svizra è la retschertga er vegnida fatga en ils Stadis Unids, en il Singapur ed en la Brasilia. Quai mintgamai cun 1'000 giuvenils. En quests pajais èn ils giuvens e las giuvnas anc pli pauc optimisticas areguard l'agen futur ch'en Svizra.
