Ils 22 d'october vegn elegì en Svizra in nov parlament. Var quatter mais avant las elecziuns publitgescha la SRG SSR il segund barometer da l'onn 2023. Il barometer mussa las intenziuns d'eleger da las votantas ed ils votants.
Verds perdan, PPS gudogna
Er tenor il segund barometer da la SRG SSR èn il Verds en la defensiva suenter il resultat da record dal 2019. Tenor il sondagi actual perdan els 3 puncts procentuals. Ils 10,2% fissan anc il segund meglier resultat da l'istorgia da la partida ma ella fiss er be anc stgars sur il resultat dal 2007 (9,6%).
Cun +1,5 puncts procentuals registrescha la Partida populara svizra per l'emprima giada en questa legislatura in plus signifitgant. Cun quest resultat fiss la pli gronda partida da la Svizra buna da gudagnar enavos ina part da la perdita da las ultimas elecziuns (-3,8 puncts procentuals).
Er la segund gronda partida, la Partida socialdemocratica è tendenzialmain tar ils victurs dal barometer cun in plus d'in punct procentual. Ina part dals votants e da las votants dals Verds paran da turnar tar ils socialdemocrats.
La quota da sbagl da la retschertga è tar +/- 1,2 puncts procentuals.
Quasi egualitad tranter la PLD e l'AdC
Tar tut las autras partidas è la situaziun en general vinavant stabila. I pudess dentant er là dar gronds midaments cunquai che la cursa per la terz pli gronda partida è ordvart stgarsa. Tranter la Partida liberaldemocratica e l'Allianza dal Center èn numnadamain be 0,3 puncts procentuals. Anc l'october era la PLD tar var 16%, ussa è ella tar 14,6%. Tenor il politolog Michael Hermann saja il motiv per la perdita da la PLD che la PPS saja stada buna da sa posiziunar meglier tar temas sco la migraziun u l’opposiziun cunter mesiras per proteger il clima.
Sche quest trend negativ cuntinuescha per la PLD, pudess l'AdC che gudogna tenor il nov barometer 0,5 puncts procentuals, surpassar la PLD. Tenor il politolog Michael Hermann pudess quai er avair in'influenza sin la cumposiziun dal Cussegl federal – l'uschenumnada furmla magica. Actualmain han las trais pli grondas partidas tuttas dus sezs. Hermann na fa dentant betg quint che la cumposiziun dal Cussegl federal sa midass gia il december da quest onn.
Midada dal clima e premias da cassas da malsauns fatschentan
En il barometer è per 40% dals dumandads e da las dumandadas la midada dal clima la pli gronda sfida politica, uschia resta ella sin plaz in. Nov sin plaz dus da las sfidas las pli impurtantas èn las premias da las cassas da malsauns. 38% vesan quellas sco sfida centrala da la politica Svizra, il mars èn quai anc stà 30%. Tar il tema premias èn er ils aderents ed aderentas da tut las partidas il pli pauc cuntents cun il curs da l'atgna partida.
Sin plaz trais e quatter da las sfidas politicas las pli relevantas, suondan l'immigraziun e la segirezza dal provediment e da l'energia. Per votantas e votants da la PPS è l'immigraziun cleramain il tema il pli relevant, per persunas che sustegnan autras partidas n'è il tema dentant pauc u insumma betg relevant.
Ravgia pervi da la CS e bloccavias per il clima
Per l'emprima giada èn er vegnids determinads ils eveniments che vilentan u disturban il pli fitg. Là dominescha il tema da la Credit Suisse. 58% han inditgà che la nausch'administraziun da la Credit Suisse ravgenta spezialmain. 40% dals dumandads e da las dumandadas vilenta il salvament da bancas cun daners da taglia. In tema actual che ravgenta er ferm, e quai surtut electuras ed electurs da las partidas burgaisas, èn ils bloccavias per il clima, pia las activistas ed ils activists che sa collan vi da la via e blocheschan il traffic. Sumegliantamain ravgentan er debattas davart il gender.
Il proxim ed ultim barometer avant las elecziuns vegn publitgà ils 6 da settember.
