Per l'emprima giada ha la Baselgia evangelic refurmada Svizra ina dunna a la testa. Cun 47 cunter 25 vuschs ha la sinoda virtuala elegì la plevonessa turitgaisa sco presidenta. Ella remplazza Gottfried Locher ch'è sa retratg il matg pervi da renfatschas da violaziuns envers collavuraturas da la baselgia. Gia avant dus onns aveva Famos candidà per il presidi, ha lura dentant pers cunter Locher. Dapi 28 onns è la dunna da 54 onns activa en diversas funcziuns en la baselgia refurmada. Dapi il 2013 maina la naschida Bernaisa (cun lieus da burgais en il Grischun e Lucerna) la pastoraziun speziala en la Baselgia evangelic-refurmada da Turitg.
Er en autras funcziuns clav mettia la sinoda sin la forza feminia, scriva la Baselgia evangelica sin sia pagina d'internet. Uschia èn elegidas Evelyn Borer sco presidenta da la sinoda e Claudia Haslebacher en il cussegl da la Baselgia evangelic-refurmada svizra.