Siglir tar il cuntegn

Header

cuntegn

Baselgias reageschan Persequitar la messa via YouTube

En la Svizra franzosa ston catolics e catolicas sviar sin YouTube sch’els vulan persequitar ina messa. En l'uvestgieu Losanna-Genevra-Friburg na datti naginas messas publicas pli e quai fin la fin d'avrigl. Mintga di a las 7 vegnia celebrà ina messa live via YouTube.

Da nov stritgà tut las messas, ha l'uvestgieu da Lugano.

Grischun e Vallais

Mesiras uschè drasticas na datti betg en tuts uvestgieus. En las baselgias catolicas en Grischun e Vallais dastgan maximal 50 persunas prender part, correspundent a las reglas chantunalas. Tenor questas sa drizza era la Baselgia evangelic-refurmada dal Grischun, sco ella scriva sin sia pagina d'internet.

En ils auters chantuns renvieschan ils uvestgieus a la limita maximala da 100 persunas ch’il Cussegl federal ha ordinà.

Influenza sin Pasca e funerals

Dapertut ston ils responsabels trair decisiuns plitost difficultusas. Uschia ha l'uvestgieu da Sitten spustà tuttas craismas previsas la primavaira e quai sin in termin anc betg enconuschent. L'emprima communiun duai vegnir spustada sin l'atun.

Las mesiras vegnan era ad avair influenza sin las festivitads da Pasca. I na vegnia betg a dar chors da baselgia ed orchester. Ins sto desister sin levadas dals pes e la crusch na vegn betg tutgada.

Era tar funerals vala la limita da persunas. Sch'ins quinta tar funerals cun dapli persunas ston ins consultar las autoritads. I vegn era supplitgà da betg emplenir bancs, mabain da sa derasar en l'entira baselgia.

Ord l'archiv

RTR novitads 09:00

Artitgels legids il pli savens

Scrollar a sanestra Scrollar a dretga