Basilea-Champagna vul promover il Rumantsch en scola

Il deputà dal Landrat dal chantun Basilea-Champagna Linard Candreia ha inoltrà ina interpellaziun. Cun quella vul el introducir rumantsch en la 6avla classa. En emnas spezialas duajan las scolaras ed ils scolars da Basilea-Champagna scuvrir la Rumantschia.

Il deputà Linard Candreia. Bild in Lightbox öffnen.

Legenda da maletgs: Vul promover il rumantsch a Basilea-Champagna: Il deputà Linard Candreia. Linard Candreia

La finamira da las emnas na saja betg ch'ils uffants da Basilea-Champagna emprendian perfect rumantsch. Els duajan surtut vegnir en contact cun la cultura Rumantscha. Quai cumpiglia era musica, istorgia e litteratura rumantscha.

Gia in temp en discussiun

Il favrer 2017 aveva ina deputada dal chantun Basilea-Champagna dumandà, sch'ins na pudess betg midar ora il Russ en il gimnasi cun l'instrucziun da Rumantsch. Russ na saja betg dumandà e Rumantsch saja la quarta lingua Svizra. Che quella proposta saja pauc realistica, vesia ella schon. L'idea da promover il Rumantsch a Basilea-Champagna era per Linard Candreia, oriund da Casti, ina buna. La fin da mars ha el silsuenter inoltrà sia interpellaziun per emnas da project rumantschas en la 6avla classa primara.

L'october è vegnida la resposta da la regenza. Quella è d’accord cun l'idea da promover il rumantsch en las scolas primaras. Ussa cumenza la planisaziun.

«Trais emnas rumantschas» gia bainbaud realitad

Indesch magisters èn interessads da far in'emna da project. Trais dad els han gia decis da planisar in pèr dis rumantschs. Ils emprims han lieu la primavaira 2018.

Lia Rumantscha è pront da sustegnair

Tenor Andreas Gabriel da la Lia Rumantscha, gida la quella da rimnar material d'instrucziun, da tschertgar persunas d'instrucziun ubain da segirar la finanziaziun. Enfin 10'000 francs vulan els metter a disposiziun per ils curs. Il rest dals custs duessan vegnir cuvrids cun daners ord il fond da lottaria dal chantun.

RR actualitad 11:00