Il chantun Basilea-Citad vul duvrar en l'avegnir uschènumnà «asfalt verd» per sanar sias vias. I sa tractia d'in catram che possia – grazia a charvun da plantas – arcunar dapli CO₂ che quai ch'i vegn emess cun producir, transportar e bajegiar la via cuntut, communitgescha il chantun Basilea-Citad. Uschia discurra il chantun dad in catram CO₂-negativ, che muntia in term decisiv sin via envers la construcziun da vias cumportablas per il clima. Ed il catram saja mo in zic pli char ch'asfalt convenziunal.
Il catrom cun charvun da plantas ha sviluppà l'uffizi chantunal da construcziun e traffic da Basilea-Citad ensemen cun in institut basilais per tecnologia da material da construcziun. Ils tests empirics dapi l'onn passà hajan mussà sin ina surfatscha da 450 meters quadrats che radund 1 tonna da l'asfalt verda po absorbar radund 50 kilograms CO₂ – pia dapli che quai che la producziun e construcziun ha duvrà.
La finamira da Basilea-Citad è ussa da duvrar l'asfalt verd ussa era sin surfatschas pli grondas. Quai cun la finamira da cuntanscher il 2037 la bilantscha da netto-nulla tar las emissiuns da gas cun effect da serra.