Siglir tar il cuntegn
cuntegn

Svizra Basilea: Regal custaivel per Museum d'art

La fundaziun Christoph Merian surdat a la collecziun dal museum trais ovras da Picasso e mintgamai ina dad Alberto Giacometti, Paul Klee, Fernand Léger e Jean Dubuffet. Quai resorta d'ina communicaziun cuminaivla da la fundaziun e dal Museum d'art.

Las set capodovras da tschintg dals pli impurtants artists dal 20avel tschientaner èn d'in relasch che la fundaziun Christoph Merian ha obtegnì avant in onn. In pèr maridà da Basilea aveva numnà la fundaziun sco ertavla suletta e surlaschà a quella sia facultad da 120 milliuns francs.

Uss ha la fundaziun decidì da surlaschar set capodovras ord quest relasch al Museum d'art ed uschia a la publicitad – quai cun la persvasiun d'agir en il senn dals legaturs. Lur intenziun era numnadamain da surlaschar lur facultad realisada a Basilea a favur da la citad da Basilea.

Il pèr aveva da lezzas uras cumprà las ovras tar il renumà galerist da Basilea Ernst Beyeler. La valur da segirada da las set ovras munta a 20,34 milliuns francs. Ils purtrets sajan en in stan extraordinari bun e cumpletteschian la collecziun dal museum a moda optimala.

RR novitads 12:00