Siglir tar il cuntegn
Inhalt

Svizra BAZL pretenda mesiras supplementaras da la JU-Air

Tar quellas mesiras tutgan ch'ils aviuns ston tegnair en ina autezza minimala, ch'ils aviuns han in apparat per registrar las datas da GPS ed ils passagiers ston metter si la tschinta durant l'entir sgol.

Dus aviuns da la JU-Air en l'aria.
Legenda: BAZL pretenda mesiras da prevenziun da la JU-Air. Keystone

Sco mesiras da segirezza supplementara pretenda il BAZL da la JU-Air:

  • Sco emprim ston ils pilots sa tegnair vi d'ina autezza da sgular minimala – ina autezza ch'è pli auta che l'autezza da sgol minimala prescritta.
  • Sco segund ston ils aviuns manar cun in apparat per registrar las datas da GPS. Cun in tal vegn registrà l'entir sgol, quai che lubescha pli tard ina valitaziun da la ruta da sgol.
  • E sco terz duain ils passagiers metter si la tschinta ed er laschar si quella durant l'entir sgol e na pon pia betg pli chaminar enturn durant il sgol.

La Ju-Air vul quest venderdi reprender il traffic aviatic cun ses dus aviuns dad oldtimer dal tip Junkers Ju-52, er numnads «Tante Ju». Suenter ch'in aviun è da quest tip è crudà giu ils 4 d'avust al Piz Segnas, n'hai fin uss betg dà indizis per in problem tecnic general vi da quests aviuns.

Las examinaziuns dal post per controllas da segirtad svizzer SUST duran però anc. Sch'il SUST avess da chattar in problem tecnic, lura vegniss il BAZL a giuditgar da nov la situaziun.

JU-Air beneventa las mesiras

La JU-Air beneventa las pretensiuns dal BAZL e vul ademplir questas pretensiuns. Sco quai che la JU-Air communitgescha sa basian las pretensiuns per gronda part sin las propostas ch'ella haja fatg al BAZL.

RR novitads 11:00