Siglir tar il cuntegn
Inhalt

Svizra BBO gudogna cun Corsin Tuor il Swiss Open Contest a Lucerna

La furmaziun bernaisa cun gronda tradiziun da brass stat dapi l'onn 2012 sut la batgetta dal dirigent rumantsch.

A chaschun da la 29avla ediziun da la concurrenza naziunala Swiss Open Contest, nua che diesch da las meglieras brass bands svizras sa mesiran mintgamai il settember en il KKL a Lucerna, èsi reussì a Corsin Tuor e sia brass band da persvader la giuria cun lur interpretaziun dal toc da pensum
«Phoenicia – Symphonic Sketches for Brass Band». Quest toc è vegnì scrit aposta per il contest 2018 dal cumponist svizzer Stephan Hodel.

Sco segund toc han els preschentà al grond public il toc da test «Prometheus» ord l'ovra «Sinfonische Dichtung Nr. 5» da Franz Liszt. L'arranschament remartgabel en brass deriva da la batgetta da Raphael Näf, in giuven scolar da Corsin Tuor, ch'ha arranschà quella ovra per brass sco lavur da matura.

Ultra da quai èsi era gist anc reussì a la BBO da gudagnar era il premi spezial per la meglra producziun dal marsch da concurrenza. Els han sunà il marsch «Black Knight» da William Rimmer.

Pia in di da success tras e tras per Corsin Tuor e sia BBO.

Wallberg Band sin plazza 7

La furmaziun Wallberg Band che s'entaupa onn per onn a posta per la participaziun al Swiss Open Contest ha cuntanschì quest onn il setavel plaz en la rangaziun finala. Quella furmaziun sa cumpona ord differents musicants dal grischun e da la svizra orientala. Rinforzads vegnan els da solists da renum internaziunal en las posiziuns principalas. Els exercitescha mintgamai en furma d'ina emna musicala avant il contest a Sursaissa Cuort. Quest onn èn els stads sut la direcziun dal belgiais Ivan Meylemans.

RR novitads 20:00