Siglir tar il cuntegn

Svizra Be paucs deponan l'arma en l'arsenal

En Svizra deponan mo paucas persunas obligadas da far servetsch lur armas voluntarmain en l'arsenal. La fin da zercladur eran quai be stgars 800. Dapi ch'igl è pussaivel da deponer l'arma persunala voluntariamain, n'èran mai dapli che 1000 armas en l'arsenal. Savens restan ellas a chasa en stgaffa.

Duas buis d'assagl deponidas en in arsenal - il rest da la stanza è vid.
Legenda: Duas buis d'assagl deponidas en in arsenal - il rest da la stanza è vid. Keystone

Quai mussan las cifras actualas dal Departement federal da defensiun. Dapi il 2010 pon las persunas obligadas da far servetsch deponer voluntarmain lur armas ordaifer il temp da servetsch. Il Cussegl federal vuleva uschia meglierar la segirezza tar las armas d'ordonana. Ma cun mai dapli che 1000 da las 170'000 armas ch'èn vegnidas deponidas è linteress vi da questa pussaivladad pitschen (0,5% da tut las armas).

En il chantun d'Uri è be in'arma en l'arsenal

Las pli bleras armas én deponidas en il chantun da Genevra. Probabel er perquai ch'il chantun da Genevra ha appelà activamain da nizzegiar la pussaivladad. En il chantun da Turig eran deponidas la fin zercladur 129, en il chantun da Berna 101, en il Giura quatter ed en il chantun d'Uri be ina. La gruppa da lavur interparlamentara per las armas d'ordononza aveva schazegià l'onn 2008 che radund 25'000 armas sajan deponidas en in arsenal enstagl d'en stgaffa a tgasa.

Leschas pli severas na chattan nagina maioritad

Gia pliras giadas han politichers sanesters e dals Verds empruvà da scumandar da prender a chasa l'arma d'ordonanza. Quellas emprvas n'han dentant mai chattà la maioritad necessaria, ni en il parlament ni tar votaziuns dal pievel.

RR novitads 07:00