Gia il mars 2017 era Beat Richner sa retratg da sia funcziun da manader dals tschintg ospitals per uffants en la Cambodscha – per raschuns da sanadad. El haja ina malsogna dal tscharvè che na saja betg curabla, aveva communitgà la fundaziun da lezzas uras.
Serrà la pratica al Zürichberg per bajegiar si las clinicas
Il 1992 aveva Beat Richner serrà sia pratica da medi al Zürichberg per bajegiar si ina clinica per uffants en la capitala cambodschana Phnom Penh. En l'ospital «Kantha Bopha» («flur oduranta») aveva Richner gia lavurà ils 1974 sco medi per la Crusch cotschna, aveva il 1975 però stuì bandunar il stadi suenter l'offensiva dals Khmers cotschens. Suenter la clinica a Phnom Penh ha Richner bajegià si ulteriuras 4 clinicas. En tut èn radund 15 milliuns uffants vegnids tractads en quests 5 ospitals – la pli gronda part da quests gratuit.
Status da clinicas universitaras
Oz han ils ospitals il status da clinicas universitaras e radund 2500 collavuraturas e collavuraturs. Ils medis indigens vegnan scolads e furmads en il rom d'ina collavuraziun strategica cun la l'ospital per uffants universitar a Turitg.
RR novitads 14:00
