La perioda da bell'aura actuala na rumpa il mument nagins records. Sulet en singuls lieus datti autas temperaturas. Tenor MeteoSvizra è ina uschenumndada situaziun d'Omega responsabla per l'aura sulegliva e miaivla actuala.
Sur grondas parts da l'Europa dettia in grond aut che saja stabil. Spezial vid la situaziun da l'aura actuala saja ch'i dettia strusch tschajera u tschajer'auta en la Svizra Bassa.
Ils meteorologs quintan che la bell'aura pudess cuzzar fin la fin dal mais u schizunt l'entschatta da mars. La zona da pressiun auta «Dorit» vegn mardi in zichel pli flaivla. Dentant gia il venderdi vegn la proxima zona da pressiun auta cun il num «Erika» ed influenzescha l'aura dals proxims dis.
Situaziun d'Omega
Avrir la boxSerrar la box
Ina situaziun d'Omega numnan ils meteorologs, sch'ina zona d'auta pressiun sa chatta tranter dus zonas da bassa pressiun. L'aria circulescha lura en furma dal bustab grec Omega « Ω ».
La situaziun d'Omega saja fitg stabil e sa era restar pli lunsch al medem lieu.
Fin 12 grads sur la media
Il medem vala per las temperaturas, era quellas na rumpan il mument nagins records. Quai malgrà ch'ils davos dis la media da las temperaturas dal di tar las pendicularas eran var 9 fin 12 grads sur la media da blers onns.
