L'imam da l'uniun muslima da Berna surprenda la responsabladad per pliras lètgs sfurzadas – e sa retira. Sco l'imam scriva, sa retira el sin la fin d'avrigl. Retschertgas dad SRF Investigativ avevan mussà ch'igl ha dà en la Chasa da las religiuns a Berna lètgs sfurzadas. L'imam responsabel aveva manchentà d'examinar en plirs cas, schebain las reglas per in matrimoni religius sajan accumplidas. Surtut l'uschenumnà primat da la lètg civila.
Imam condemnescha lètgs sfurzadas
Tenor il communitgà da l'uniun muslima Berna èsi era per l'imam sez impurtant che quests cas sajan vegnids a la glisch. I sa tractia d'in «grond delict detestabel». El condemneschia lètgs sfurzadas. Da surprender la responsabladad publicamain saja era impurtant per che l'islam svizzer possia s'etablir e na sa retiria betg en in mund parallel.
Pass giuridics: Denunzia encunter nunenconuschent
Tgi ch'ha fatg talas ceremonias illegalas en la moschea da la Chasa da las religiuns, n'è betg cler. L'organisaziun Chasa da las religiuns ha perquai instradà pass giuridics e fatg ina denunzia encunter nunenconuschent. Da maridar insatgi encunter sia veglia è scumandà en Svizra. En la Chasa da las religiuns che survegn sustegn dal maun public èn unidas otg cuminanzas religiusas.