Sco quai che la Polizia chantunala bernaisa ha communitgà sin il chanal da socialmedia X (pli baud Twitter) èn vegnids chattads dus objects. Quels èn vegnids examinads e sa mussads sco nunprivlus.
L'avantmezdi ha la polizia serrà la Plazza federala e la Gassa federala a Berna. Sin la Plazza federala sa chattava in singul vehichel. La polizia ha perquirì il conturn. Curt sisura han collavuraturas e collavuraturs da l'administraziun en la Chasa federala vest stuì vegnir evacuads.
Er il center da medias visavi la Chasa federala vest è vegnì rumì. Schurnalistas e schurnalists han stuì bandunar il bajetg. Ulteriuras infurmaziuns n'ha la polizia betg dà.
Acziun sin fundament d'in object suspectus
La Polizia chantunala da Berna ha rapportà via X (pli baud Twitter) ch'ellas sajan en acziun sin fundament d'in object suspectus. Scleriments sajan en acziun da spezialistas e da spezialists, hai num vinavant.
Gia la segunda bloccada quai mais
L'ultima giada era la Plazza federala vegnida serrada avant var duas emnas pervia d'in object suspectus. Quel è lura sa mussà sco nunprivlus.