Siglir tar il cuntegn

Header

cuntegn

Svizra Berna: Satgados suspectus n'ha gì nagin cuntegn privlus

A Berna ha la polizia bloccà mardi saira la Plazza federala e pliras vias en il conturn pervi d'in satgados suspectus. Ina persuna ch'era probablamain armada ha la polizia arrestà en quest connex. La persuna duai avair smanatschà, scriva la polizia chantunala. Il satgados è vegnì transportà davent.

Sco quai che la polizia ha infurmà, haja l'um arrestà gì cun el in'arma da 'softair'. Ina tal'arma na saja betg da differenziar d'ina normala arma per laics. Plinavant haja il satgados che la polizia ha controllà gia al lieu cun in roboter, cuntegnì nagut privlus. I haja sa tractà d'apparats electronics normals, ha ditg il pledader da la polizia dal chantun da Berna a l'agentura da novitads SDA.

Sco quai che la polizia ha rapportà, hajan passants alarmà la polizia curt suenter las 21:00 uras il mardi saira. Tenor perditgas haja in um armà deponì in satgados datiers da la Plazza federala ed haja smanatschà. Curt suenter haja la polizia lura arrestà l'um en il center da la citad.

Satgados è vegnì intercurì cun in roboter

Spezialists da fieu ed explosiuns da la polizia han intercurì il satgados al lieu. Quel è vegnì intercurrì l'emprim cun in roboter e lura transportà davent cun quel. Curt suenter mesanotg ha la polizia puspè dà liber l'areal davant la Chasa federala.

La polizia è anc vid sclerir il cas. Avis sin in pussaivel act terroristic na dettia dentant betg il mument.

RR novitads 06:00

Artitgels legids il pli savens